العروسة نجحت
- سامح
- Oct 27, 2024
- 2 min read
المكان بسيط وملخبط شوية، لكن، كويس جداُ بالنسبة لها…
شقة ضيقة شوية وواسعة شوية، لكن، فيها اللي هاتحتاجه الفترة المؤقته لغاية ما يوصل من السفر…
ممكن تتعب شوية في التنضيف…
هو وعدها إنه هايكون متابعها أول بأول بنظام المراقبة وهايبعت لها كل اللي تحتاجه … لو إتأخر شوية معلش، تصبر وهو هايبعت مبلغ مناسب في الوقت المناسب. لكن هي ماتكسلش وتهتم بالبيت وتحافظ على الكام زرعة الصغيرة وماتنساش أكل بوسي (القطة) وتنضفها وتغيّر لها الرمل كل كام يوم…
ده في حد ذاته حلو… دي كانت عايشة حياة معدمة كأنها موش عايشة أساساً…
ربنا يكرمه، أخدها واهتم بيها وأجر لها الشقة دي بڤارانده معقوله…
المندوب بتاعه قال لها:
"الباشا شايفك إنسانة رائعة وعلى خلق ونفسه يتأكد فعلاًً إنك الإنسانة اللي تستاهل تدخل قلبه وتعيش معاه إلى ما شاء الله في قصره في المريوطية… مجرد ما يرجع من السفر تتجوزوا على سنة الله ورسوله وتعيشي معاه في العزبة"
اتخضت وفرحت وردت بلجلجة:
"بسرعة كده ؟… ده احنا مالحقناش نتعرف ببعض…"
قاطعها:
"هو عارفك كويس ومتأكد إنك مناسبة، لكن
عشان تعرفيه أكتر…
هو حكى لي عن نفسه وأنا كتبت كل حاجه هو بيحبها او مابيحبهاش في كتاب صغير… إتفضلي!"
إداها كتاب مذهب وكمل كلامه:
"فيه كل الأكلات والالوان والكلمات والحاجات اللي بيحبها سعادته، اهتمي انك تتعلميها وتعمليها والحاجات اللي بيتضايق منها أوعي تعمليها…
كلها في الكتاب…
إقريه كويس وافهميه عشان تعرفيه وتتعلمي الحاجات اللي بيحبها وتتعودي تعمليها…"
أخد نفس وكمل كلامه بابتسامة مرحبة:
"لو جه من السفر لقاكي بتعملي اللي اتفقنا عليه، يابختك… هايخدك على العزبة ويعيشك في دلع وسعادة طول العمر"
سكته قصيرة… وقلب وشه:
"لكن لو لاقدر الله لقاكي موش جاهزة ! ترجعي زي ماكنتي قبل ما تيجي هنا… لحياتك المعدمة… أظن واضح !"
الخوف ملاها اكتر من الفرحة باختيارها للحياة دي…
هي متراقبه بالكاميرات…
مكتوب عنه في الكتاب لكن مابتشوفهوش…
مستقبلها مرتبط بأعمالها… يا تنجح يا تسقط…
هاييجي امتى بالظبط؟ موش عارفه…
هو بيحبها؟ يمكن بيحبها لو هي حلوة… بتعمل حاجات حلوة… هو عاوزها تبقى حلوة وشاطرة… دي مصلحتها أكيد…
بس موش ده اللي بتحلم بيه ولا ده اللي هي محتاجاه…
هي نفسها ف راجل، راجل موش سي السيد، راجل يحبها زي ما هي ويقبلها ويضحي عشان خاطرها ويسامحها موش يحطها في امتحان…
راجل يمسك بإيدها وياخدها خطوة خطوة عشان تبقى حلوة فعلاً ، حلوة شبهه… زي ما هو حلو كده…
عاوزة تبقى مقبولة ومحبوبة وحرة…
كتير ده؟!
الصورة وجدت على Freepik
Comments