جالي يا مولانا

• باشوفه في احلامي يا مولانا…

• النبي عيسى؟

• ايوه يا مولانا...

• رؤيا الانبياء خير و حق يابني… شكله ايه ؟

• شبه شكله في الفيلم بتاع ميل چيبسون ، بس له هيبه تخوف ، و في نفس الوقت حسيت بالحنية كأني شايف ابويا الله يرحمه ، وحسيت اني باحبه و نفسي اروح له و اخده بالحضن و امسك فيه ، بس … بس رجليا موش مطوعاني كأني متكتف… او مربوط بحبل او سلسلة حديد…

• قالك حاجه او شاور لك مثلاً؟ اداك حاجه او اخد منك حاجه؟

• ما اتكلمش ، لكن بص لي و فهمت معنى نظرته، كأنه بيلومني و في نفس الوقت بيحبني و بيقول لي قرَّب … تعالى … او بيقول لي"مستني ايه؟ ماتيجي؟ "… كل ده فهمته من نظرة عنيه كأنه بيتكلم جوايا موش في وداني…

• دي رؤيا حق يا بني و النبي عيسى بيعتب عليك زي ما عتب على الحواريين و بيدعوك لطاعة الله و القرب منه…

• لأ يا مولانا … لأ… انا فاهم معنى الحلم … ده بيدعوني ابقى مسيحي …

• انت غلطان يابني … اسمع مني انا ياما شفت و سمعت… الدين عند الله الاسلام يا مؤمن يابني… شوف نَفسك قصّرت في ايه في العبادات و الطاعات … انت ضميرك صاحي و روحك منفتحه على النور الالهي ، و عشان كده انت شفت نظرة العتاب و الحب في عنين النبي عيسى بن مريم عليه السلام… روحك لمستها نفحة من نفحات النور و النفحة دي فيها دعوة ليك عشان تطلع لمنزلة اعلى من الطاعات … قد تكون الشهادة في سبيل الله … عشان كده النبي عيسى هو اللي جالك يوصَّل لك الرسالة لانه قال من زمان و لسه بيقول ليك و ليا: "مَن انصاري الى الله؟"… اكثِر من تلاوة القرآن و ذِكر الله و الصلاة على النبي … اقرأ آية الكرسي قبل النوم وشغل القرآن بصوت عالي لغاية ما تروح في النوم… بالشكل ده هاتنكشف قصادك الدعوة بشكل اوضح و روحك هاترتاح… اعمل كده و انا متأكد انك هاتفهم و تلبي الدعوة يا مؤمن يابني … تعالى الجمعة الجاية طمني عليك يابني ارجوك ... ارجوك تطمني عليك يا حبيبي...

Photo found on https://st-takla.org/